Burç Eruygur
22 Јули 2025•Ажурирај: 23 Јули 2025
ИСТАНБУЛ (АА) – Русија денес објави дека значително ја проширува листата со европски официјални лица на кои им е забранет влез во земјата, како одговор на најновите пакети санкции на Европската Унија за Москва, јавува Анадолу.
Руското Министерство за надворешни работи соопшти дека забраната за влез е проширена како одговор на 17. и 18. пакет санкции на ЕУ усвоени на 20 мај и минатата недела, соодветно.
„Европската Унија продолжува да ги засилува своите еднострани, нелегитимни според меѓународното право, рестриктивни мерки против Русија, со што ги поткопува надлежностите на Советот за безбедност на ОН“, се вели во соопштението.
Обновената листа опфаќа „вработени во агенции за спроведување на законот, државни и приватни организации, граѓани на земји членки на ЕУ и на други западни држави што се одговорни за обезбедување воена помош за Киев“, се додава понатаму.
Цел на санкциите се и претставници што се вклучени во формирањето на трибуналот воспоставен минатиот месец од Украина и Советот на Европа, како и функционери што се залагаат за конфискација на руските средства или користење на нивните приходи за поддршка на Киев.
„Антируските и непријателските активности не може да имаат никаков ефект врз политиката на нашата земја. Русија ќе продолжи да го следи патот на заштита на своите национални интереси и изградба на нов праведен светски поредок“, соопшти Министерството, додавајќи дека секој иден чекор со санкции од ЕУ ќе добие „навремена и соодветна“ реакција.
Министерството не ги објави имињата на лицата опфатени со проширената забрана за влез.
Инаку, 18. пакет санкции на ЕУ, усвоен минатиот петок, е насочен кон приходите на Русија од енергетскиот сектор, банкарството, воените набавувачи и трговските текови, а истовремено ги заострува ограничувањата и за Белорусија.
