САД извршија напади во Ирак и Сирија како одговор на ракетниот напад врз американската база

ВАШИНГТОН (АА) – Американската централна команда (ЦЕНТКОМ) објави дека извршила воздушни напади врз позиции на силите на Иранската револуционерна гарда и нејзините други групи во Ирак и Сирија, јавува Анадолу.

ЦЕНТКОМ наведе дека ги извршиле првите напади во регионот како одговор на нападот врз американската база на сириско-јорданската граница на 28 јануари.

Во соопштението се истакнува дека најмалку 85 позиции на силите Кудс на Иранската револуционерна гарда и нивните соработници во Сирија и Ирак биле погодени во воздушните напади.

Се додава дека во нападите биле вклучени и бомбардери со долг дострел кои полетале од Соединетите Американски Држави и дека се употребени над 125 наведувани бомби.

Во соопштението се наведува дека гаѓани биле командно-контролните центри, ракетите, проектилите и беспилотните летала.

Во напад врз американска база на 28 јануари загинаа тројца американски војници, а над 40 беа ранети.

Американската администрација најави дека како одговор на нападот ќе започне опсежни напади кон групите поддржани од Иран.