САД одобрија можна продажба на воени хеликоптери за 800 милиони долари на Ирак

САД одобрија можна продажба на воена опрема во вредност од 800 милиони долари на Ирак, што вклучува хеликоптери „Бел 412ЕПИКС“ и „Бел 407М“, како и придружна опрема, соопшти американскиот Стејт департмент, пренесува Анадолу.

Предложениот пакет вклучува хеликоптери, тешки митралези „ГАУ-19“ со три цевки, ракетни системи, електрооптички/инфрацрвени сензори, системи за откривање и лансирање ракети, радиоуреди, резервни делови и опрема за копнена поддршка.

Според соопштението на Стејт департментот, пакетот опфаќа и обука на пилоти и персонал за одржување, како и инженерска, техничка и логистичка поддршка од американската Влада и изведувачи.

Од Стејт департментот соопштија дека предложената продажба ќе ја поддржи американската надворешна политика и интересите за национална безбедност преку зајакнување на безбедносните капацитети на стратегискиот партнер.

Според Департментот, пакетот има цел да ја подобри способноста на Ирак да одговори на сегашните и идните закани, особено преку унапредување на неговите капацитети за транспорт со хеликоптери, извидување и воздушно-земјено насочување кон цели.