Светскиот ден на папагалите го привлекува вниманието кон заштитата на популацијата на овие птици

СКОПЈЕ (АА) - Папагалите, кои се едни од највпечатливите видови меѓу животинскиот свет на планетата, со векови продолжуваат да го привлекуваат вниманието на луѓето благодарение на нивните разнобојни пердуви, а најмногу поради вештините на имитирање, јавува Анадолу.

Постојат речиси 400 видови папагали низ целиот свет, меѓу кои спаѓаат мали папагали, ара папагали (макао), нимфите и какадуата.

Од нив значителен број се соочуваат со опасност од истребување поради заканите како што се ловокрадството, нелегалната трговија и губењето на живеалиштата.

Меѓународната организација за помош на овие птици „World Parrot Trust“ го прогласи 31 мај за „Светски ден на папагалите“ со цел да привлече внимание кон заштитата на нивните популации.

Овој посебен ден, кој се одбележува секоја година од 2004 година, има за цел да ја подигне свеста за заканите со кои се соочуваат папагалите.

Инаку, најмалиот папагал е жолтоглавиот пигмејски папагал, тежи околу 10-15 грама и е долг околу 8,5 сантиметри. Најголемиот папагал е хијацинтниот ара папагал, кој може да порасне и до 90-100 сантиметри.

Папагалите се долговечни. Какапо папагалите можат да живеат до 95 години, црвените ара папагали живеат 40-50 години, а африканските сиви папагали можат да живеат до 50 години во дивината.

Тие комуницираат едни со други преку пердувите на опашката и звуците што ги испуштаат. Некои се вцрвенуваат за да ги покажат своите емоции, а можат да имитираат и други животни, вклучително и луѓе.

Папагалите се многу паметни. Истражувачите покажаа дека африканските сиви папагали имаат когнитивни вештини на петгодишно дете.