Светските лидери изразија солидарност со Туркије по разорниот земјотрес

ИСТАНБУЛ (АА) - Светските лидери изразија поддршка на Туркије по земјотресот со јачина од 7,4 степени според Рихтеровата скала што ги погоди југоисточните региони на земјата, при што загинаа најмалку 284 лица, јавува Анадолу.

„Длабоко сум тажен откако дознав за разорниот земјотрес што погоди делови на Туркије и Сирија. Моето најдлабоко сочувство до бројните семејства кои ги загубија животите и посакувам брзо опоравување на повредените“, порача преку Твитер претседателот на Европскиот совет, Шарлс Мишел.

„Европската Унија изразува длабока солидарност со вас“, нагласи Мишел.

Порака за солидарност со Туркије упати и Роберта Мецола, претседателката на Европскиот парламент.

„Длабоко сум ожалостена по ужасниот земјотрес на турско-сириската граница. Моите мисли се со настраданите, со заглавените под урнатините, повредените и со сите спасувачи кои прават сé што можат за да спасат животи.“

„Европа стои со народот на Туркије и Сирија во овој тежок миг“, рече Мецола.

Челникот на НАТО, Јенс Столтенберг, преку Твитер испрати порака за поддршка до Туркије.

„Во контакт со претседателот Реџеп Таип Ердоган и министерот за надворешни работи Мевлут Чавушоглу, а сојузниците од НАТО во моментов мобилизираат поддршка“, рече Столтенберг.

Изразувајќи сочувство со турскиот народ, француската министерка за надворешни работи Катрин Колон порача дека Франција е подготвена да ѝ пружи помош на Туркије.

Украинскиот претседател Владимир Зеленски исто така изјави дека Киев е подготвен да обезбеди помош за Туркије и турскиот народ.

„Ние сме со турскиот народ во овој тежок момент. Подготвени сме да пружиме помош за надминување на последиците од оваа катастрофа“, рече Зеленски.

Руската амбасада во Анкара преку Твитер ја изрази својата солидарност со Туркије.

„Упатуваме наши најдобри желби до граѓаните и сите наши турски пријатели кои се погодени од земјотресот што се случи во Кахраманмараш и кој се почувствува во многу градови, и се надеваме дека ќе ја надминеме оваа катастрофа со најмала штета“, соопштено е од руската Амбасада.

„Нашето сочувство до семејствата на загинатите, а на повредените им посакуваме брзо опоравување“, се додава.

Најмалку 284 лица загинаа, а 2.323 се повредени во десет турски области во силниот земјотрес што утрово ги погоди јужните делови на Туркије, изјави турскиот потпретседател Фуат Октај.

„Вкупно 1.710 згради се урнаа во земјотресот“, рече Октај на прес-конференција.

Епицентарот на земјотресот е регистриран во округот Пазарџик во турски Кахраманмараш, а по него се регистрирани 50 последователни потреси, од кои најсилниот со јачина од 6,6 степени според Рихтеровата скала.

Од земјотресот сериозно се погодени и Газиантеп, Шанлиурфа, Дијарбакир, Адана, Адијаман, Малатија, Османије, Хатај и Килис.

Земјотресот е почувствуван и во соседна Сирија, каде што загинаа најмалку 427 луѓе, а стотици се повредени. Потресите се почувствувани и во Ирак, Либан, Египет и други региони.