Седум полицајци се киднапирани, осуммина милитанти убиени во жестоки судири во Северозападен Пакистан

КАРАЧИ (АА) - Најмалку седум пакистански полицајци се киднапирани, а осуммина милитанти и еден војник се убиени во повеќечасовните судири во северозападната пакистанска провинција Хајбер Пахтунхва, изјавија денес извори за Анадолу.

Осомничените милитанти киднапираа седум полицајци во дистриктот Бану, во близина на немирниот племенски регион Северен Вазиристан, кој некогаш беше феуд на Техрик-е-Талибан Пакистан (ТТП), конгломерат од неколку милитантни групи што се борат против безбедносните сили и органите на редот речиси 18 години.

Операцијата за пронаоѓање на киднапираните полицајци е во тек, изјави телефонски за Анадолу началникот на полицијата во градот Бану, Зијаудин Ахмед Ахмед, потврдувајќи дека инцидентот се случил во текот на вчерашниот ден.

Пакистан бележи пораст на терористичките напади, главно во неговите северозападни и југозападни региони во последните неколку месеци.

Вчера и денес избувнаа судири во долината Тирах во племенскиот округ Хајбер, во близина на границата со Авганистан, при што загинаа осуммина припадници на таканаречената милитантна група Лашкар-е-Ислам, вклучително и нејзиниот врховен командант Амер Тајеб, изјави за Анадолу полициски претставник барајќи да остане анонимен.

Во судирите се повредени уште петмина милитанти, додаде тој.

Според непотврдени извештаи, во судирите загинале осум полицајци, но официјален претставник од канцеларијата на заменик-комесарот на Хајбер го демантираше тоа.