Rania R.a. Abushamala
15 Мај 2025•Ажурирај: 15 Мај 2025
ИСТАНБУЛ (АА) - Сирискиот претседател Ахмад ал-Шара во среда ја поздрави смелата одлука на американскиот претседател Доналд Трамп за укинување на долгогодишните санкции за Сирија, нарекувајќи ја пресвртница за иднината на земјата, известува Анадолу.
„Денес го означува почетокот на сериозна работа и почетокот на патот на модерна Сирија“, рече Ал-Шара во телевизиското обраќање до нацијата.
Тој ја опиша одлуката на американскиот претседател Трамп за укинување на санкциите за Сирија како „храбра одлука што ги постави темелите за регионална стабилност“.
Тој, исто така, изрази длабока благодарност до регионалните сојузници, особено до Турција.
„Претседателот Реџеп Таип Ердоган застана покрај сирискиот народ, а неговата земја ‘понесе голем товар’ во изминатите 14 години“, рече тој.
Во пораката до меѓународната бизнис-заедница Ал-Шара упати отворена покана, во која вели: „Ги поздравуваме сите инвеститори и ги повикуваме да ги искористат достапните можности.“
Тој ги отфрли сите обиди за поделба на земјата.
„Нема да дозволиме поделба на Сирија ниту, пак, ќе им дадеме простор на наративите на поранешниот режим насочени кон фрагментација на нашиот народ“, додаде претседателот Ал-Шара.
