Сирија го обвини Израел за поставување воени пунктови во демилитаризирани зони

ИСТАНБУЛ (АА) – Сирискиот министер за надворешни работи Асад ал-Шејбани денес го обвини Израел дека го прекршува Договорот за недејствување на силите од 1974 година со поставување разузнавачки центри и воени пунктови во демилитаризираните области, со цел да ги спроведе своите „експанзионистички и делбени планови“, јавува Анадолу.

Шејбани ги изнесе обвинувањата на итниот состанок на министрите за надворешни работи на Организацијата за исламска соработка (ОИС), свикан поради израелската војна против населението во Појасот Газа.

„Израелската окупација го прекршува Договорот за недејствување од 1974 година, резолуциите на Советот за безбедност на ОН и принципите за почитување на државниот суверенитет и територијалниот интегритет со воспоставување разузнавачки центри и воени пунктови во забранетите зони, служејќи му на својот експанзионистички и делбен проект“, изјави тој.

Шејбани предупреди дека ваквите дејства имаат цел да го „разбијат националното ткиво на Сирија, да поттикнат деноминациски конфликти и окупираната Голанска Висорамнина да ја претворат во база за ново територијално проширување“.

„Сирија ќе остане отпорна на обидите за поделба“, потенцираше Шејбани.

Шефот на сириската дипломатија ги повика ОН „целосно да ја преземат својата одговорност за документирање и запирање на израелските упади и прекршувања“, а од ОИС побара „да ја поддржи позицијата на Сирија на меѓународната сцена и да се спротивстави на секој обид за легитимирање на окупацијата или наметнување реалност со сила на сметка на сирискиот суверенитет“.

Договорот за недејствување на силите, постигнат по Арапско-израелската војна во 1973 година, имаше цел да се раздвојат завојуваните сили и да се стави крај на директните судири меѓу двете страни.

Со договорот беа воспоставени две главни линии – Алфа и Браво – за раздвојување на сириските и израелските сили, а меѓу нив беше формирана тампон-зона под надзор на Мировните сили на ОН за набљудување на раздвојувањето (УНДОФ).

Дамаск повеќепати ги осуди постојаните израелски прекршувања на сирискиот суверенитет и ја потврди својата посветеност на Договорот од 1974 година. Израел го прогласи договорот за ништовен по падот на режимот на Башар ал-Асад кон крајот на 2024 година.

Новата сириска транзициска администрација, предводена од претседателот Ахмед ал-Шара, е формирана во јануари, но израелската војска и покрај тоа повеќепати навлегуваше на сириска територија и изведуваше воздушни напади во кои загинаа цивили и беа уништени сириски воени објекти и инфраструктура.

Последните седум месеци израелската армија ја окупира планината Хермон (Џабал ал-Шеик) и безбедносен појас широк 15 километри во делови на Јужна Сирија, контролирајќи повеќе од 40.000 Сиријци во рамките на заземената тампон-зона.

Израел окупира поголем дел од сириската Голанска Висорамнина од 1967 година. Сириските власти велат дека Израел го искористил соборувањето на Асад за да ја прошири својата окупација.

Асад, лидер на Сирија речиси 25 години, избега во Русија минатиот декември, со што заврши режимот на партијата Баас, која беше на власт од 1963 година. Во јануари беше формирана нова преодна администрација предводена од претседателот Ахмед ал-Шара.