Сопругата на убиениот хонорарен снимател на АА: 31 лице од неговото семејство се убиени во израелските напади

ГАЗА (АА) – Сопругата на Саед Абу Набхан, хонорарен снимател на Анадолу кој беше убиен од израелските сили во Газа, изјави дека 31 член од семејството на нејзиниот сопруг биле убиени во тековните израелски напади, јавува Анадолу.

На 10 јануари израелската армија изврши напади врз бегалскиот камп Ал-Џадид откако го опколи подрачјето каде што имаше неколку новинари.

На снимките од местото на настанот се гледа како спасувачите со носила носат повредено лице надвор од зградата.

Во близина е забележан Абу Набхан како трча со опремата за да го сними нападот. Неколку моменти подоцна погоден е од огнено оружје.

Тој паѓа на земја и останува неподвижен неколку секунди.

Присутните се трудат да му пристапат, плашејќи се и тие да не бидат цел на израелскиот оган.

Бера Зијад Абдулафиз Хамиде, сопруга на Абу Набхан, за Анадолу изјави дека нејзиниот сопруг имал само 25 години.

Таа рече дека претходно тој живеел во бегалскиот камп Ал-Џадид, северозападно од бегалскиот камп Нусејрат во централна Газа.

„Саед и јас го имаме 15-месечниот Анас. Нашето дете се роди околу еден месец пред да започнат израелските напади“, рече таа.

Таа додаде дека вкупно 31 член од семејството на Саед се убиени од израелските сили. Во израелската офанзива, која продолжува од нападите на Хамас на 7 октомври 2023 година, досега умреа над 46.000 лица во блокираната енклава.

Неговите пријатели рекоа дека Абу Набхан немал многу време да поминува со своето дете поради тешките услови во Газа. Го паметат како ведар и насмеан човек.