Трамп: Движењето кон мировен договор најдобриот начин да се стави крај на војната меѓу Русија и Украина

ИСТАНБУЛ (АА) - Американскиот претседател Доналд Трамп денес изјави дека придвижувањето кон мировен договор ќе биде „најдобриот начин“ за ставање крај на тековната руско-украинска војна, по телефонскиот разговор со украинскиот претседател Владимир Зеленски и европските лидери, јавува Анадолу.

„Сите беа убедени дека најдобриот начин да се стави крај на ужасната војна меѓу Русија и Украина е директно да се оди кон мировен договор, со кој би се завршила војната, а не само кон Договор за прекин на огнот, кој честопати не издржува“, порача Трамп преку својата компанија за социјални медиуми „Truth Social“.

Неговите коментари дојдоа неколку часа по средбата со рускиот претседател Владимир Путин на Алјаска. Тоа беше првата средба меѓу руски и американски претседател од почетокот на војната во Украина пред речиси три и пол години.

Нарекувајќи го својот состанок со Путин „многу добар“, како и неговиот последователен телефонски разговор со Зеленски и разни европски лидери, Трамп потврди дека неговиот украински колега ќе допатува во Вашингтон во понеделник попладне.

„Ако сè се среди, тогаш ќе закажеме средба со претседателот Путин. Потенцијално, животите на милиони луѓе ќе бидат спасени“, додаде Трамп.

Претходно денес, Зеленски на американската компанија за социјални медиуми X објави дека ќе се сретне со Трамп во Вашингтон во понеделник за да се „разговара за сите детали во врска со ставање крај на убивањето и војната“.