Трамп: Камала Харис со својата неспособност ќе ги внесе САД во Трета светска војна

ИСТАНБУЛ (АА) - Републиканскиот претседателски кандидат Доналд Трамп предупреди дека неговата демократска ривалка Камала Харис би можела да ги внесе Соединетите Американски Држави (САД) во жешка војна ако победи на изборите на 5 ноември, велејќи: „Таа ќе нѐ воведе во Трета светска војна, гарантирано, бидејќи таа е премногу неспособна да ја врши работата“, јавува Анадолу.

На вчерашниот митинг во Пенсилванија, поранешниот претседател Трамп рече дека потпретседателката Камала Харис не би била способна да „се носи“ со лидери како рускиот претседател Владимир Путин и кинескиот Си Ѓинпинг, јавија американските медиуми.

Изјавувајќи дека светот „никогаш не бил толку блиску“ до глобална војна, Трамп вети дека ќе избегне таква војна доколку стане претседател.

„(Камала Харис) Да се избере за претседател би било коцкање со животите на милиони луѓе. Синовите и ќерките ќе бидат повикани да се борат во војна во земја за која никогаш не сте слушнале“, рече Трамп.

Политичките аналитичари велат дека тековните конфликти и на Блискиот Исток и во Украина претставуваат проблем за Харис, бидејќи тие се случија за време на администрацијата на Харис и претседателот од редот на демократите Џо Бајден.

Харис и нејзините сојузници укажаа на воодушевувањето на Трамп кон „стронгмен“ лидери како што се Путин и севернокорејскиот Ким Џонг Ун, и неговиот презир кон сојузниците на САД во НАТО, обвинувајќи го дека е „фашист“ и велејќи дека ја избрал погрешната страна во конфликтот меѓу демократиите и автократите.