Трамп: Прекинот на огнот во Украина сега зависи од Русија откако Киев го прифати предлогот

ВАШИНГТОН (АА) - Американскиот претседател Доналд Трамп денес изјави дека судбината на договорот за прекин на огнот што ќе ја запре војната во Украина на 30 дена сега е во рацете на Русија откако Киев го прифати предлогот, јавува Анадолу.

„Сега зависи од Русија, но, всушност, имавме добри односи со двете страни и ќе видиме. Луѓе одат во Русија токму сега додека зборуваме. И се надеваме дека може да издејствуваме прекин на огнот од Русија. И ако го сториме тоа, мислам дека тоа ќе биде 80 отсто од патот до завршување на ова ужасно крвопролевање“, рече тој во Белата куќа на средбата со ирскиот премиер Мајкл Мартин.

Трамп се закани дека ќе воведе „погубни“ економски казни за Русија доколку претседателот Владимир Путин го отфрли договорот.

„Има работи што може да ги направите што не би биле пријатни во финансиска смисла. Можам да правам работи што финансиски би биле многу лоши за Русија. Не сакам да го правам тоа бидејќи сакам да постигнам мир“, рече тој. „Се приближуваме до тоа да направиме нешто.“

Украина вчера прифати 30-дневно примирје што Трамп го нарече „целосен прекин на огнот“, по преговорите со американската делегација предводена од државниот секретар Марко Рубио и советникот за национална безбедност Мајк Валц во Саудиска Арабија.

Во заедничкото соопштение објавено по состанокот се испуштени „безбедносните гаранции“, обврската на САД да настапат доколку Русија го прекрши примирјето, но украинскиот претседател Владимир Зеленски во синоќешната видеопорака рече дека за нив се разговарало за време на состанокот.

Зеленски истакна дека САД и Украина подетално ќе разговараат за безбедносните гаранции доколку се имплементира прекин на огнот.