Трамп се закани со одземање сертификати и 50 отсто царини за канадските авиони

ВАШИНГТОН (АА) – Американскиот претседател Доналд Трамп денес изјави дека Соединетите Американски Држави (САД) би можеле да им ги одземат сертификатите на авионите произведени во Канада и да воведат високи царини, доколку Отава не ја смени, како што рече, неправедната одлука да одбие сертификација на неколку модели на американскиот производител „Галфстрим“, јавува Анадолу.

Трамп во објавата на својата социјална мрежа Truth Social ја обвини Канада дека „погрешно“ и „незаконски“ ја блокира сертификацијата на моделите Галфстрим 500, 600, 700 и 800, кои ги опиша како едни од технолошки најнапредните авиони во светот.

Тој посочи дека одговорот на САД би вклучувал одземање на сертификатите на авионите Бомбардиер Глобал Експрес, како и можност за проширување на мерките и на сите авиони произведени во Канада.

„Канада практично ја забранува продажбата на производите на ‘Галфстрим’ во земјата преку ист процес на сертификација“, напиша Трамп, додавајќи дека Вашингтон ќе дејствува сè додека компанијата не биде „целосно сертифицирана, како што требало да биде уште пред многу години“.

Трамп предупреди дека, доколку прашањето не биде „веднаш коригирано“, неговата администрација ќе воведе царина од 50 отсто за сите авиони од Канада што се продаваат на американскиот пазар.

Овие изјави претставуваат ескалација на трговските тензии меѓу САД и Канада.

Канадските официјални претставници засега не одговорија на изјавите на Трамп, а не е јасно дали американските регулаторни тела веќе презеле формални чекори за одземање на сертификатите на канадските авиони.