Трамп: Сега е на сила прекинот на огнот меѓу Израел и Иран

АНКАРА (АА) - Американскиот претседател Доналд Трамп утринава објави дека сега е на сила прекинот на огнот меѓу Иран и Израел, повикувајќи ги двете страни да го почитуваат, јавува Анадолу.

„Прекинот на огнот сега е на сила. Ве молам, не прекршувајте го!“, напиша Трамп на својата платформа за социјални медиуми Трут Соушал.

Трамп вчера објави дека Израел и Иран се согласиле на „целосен и тотален“ прекин на огнот во услови на растечки конфликт на Блискиот Исток.

Иран вчера лансираше бараж од ракети врз воздухопловната база Ал Удеид на американската војска во Катар, што означува драматична ескалација на тензиите по американскиот напад врз три ирански нуклеарни постројки во неделата.

Централната команда на САД (ЦЕНТКОМ) соопшти дека американските сили, заедно со Катар, „успешно“ се одбраниле од нападот, потврдувајќи дека нема жртви меѓу американскиот или катарскиот персонал.

Регионалните тензии ескалираа во неделата откако САД ги бомбардираа иранските нуклеарни постројки Фордо, Натанз и Исфахан.

Нападите на САД беа најнова ескалација во израелскиот воен напад поддржан од САД врз Иран од 13 јуни, што го поттикна Техеран да започне одмазднички напади врз Израел.

Израелските власти соопштија дека оттогаш во иранските ракетни напади се убиени најмалку 25 лица, а стотици се повредени.

Во Иран се убиени најмалку 430 лица, а повеќе од 3.500 се ранети во израелските напади, според иранското Министерство за здравство.