Украина: Руски ракетен напад насочен кон енергетската инфраструктура

ИСТАНБУЛ (АА) - Украина денес соопшти дека масовен руски ракетен напад е извршен врз енергетската инфраструктура на земјата, јавува Анадолу.

„Енергетскиот сектор повторно е под масовен напад од непријателот. Низ Украина се случуваат напади врз енергетските капацитети“, рече министерот за енергетика Херман Халушченко во соопштение на Фејсбук.

Наведувајќи дека операторот на електричната мрежа во земјата „Укренерго“ спровел итен прекин на електричната енергија, Халушченко истакна дека степенот на штетата ќе се процени кога ќе дозволи безбедносната ситуација.

Началникот на градската воена управа на Киев, Серхи Попко, на Телеграм изјави дека фрагменти од соборените проектили паднале на територијата на претпријатие во областа Дарницки, оштетувајќи неколку помошни згради. Во Харков, втор по големина град во Украина, гувернерот Олех Синјехубов на Телеграм изјави дека цивилното претпријатие било оштетено во нападот.

Прекини на струја беа пријавени и од локалните власти во повеќе региони на Украина, вклучително Лавов, Ривне и Волин.

Во меѓувреме, украинскиот приватен енергетски снабдувач ДТЕК рече дека прекините на струја спроведени од „Укренерго“ го погодиле Киев, како и регионите Одеса, Днепропетровск и Доњецк.

На друго место украинската национална железничка компанија „Укрзализница“ соопшти дека повеќе од 150 нејзини возови сообраќаат според распоредот и покрај ракетните напади, за кои рече дека резултирале со прекини на струја во одредени делови од железничкиот систем на земјата.

Руските власти сѐ уште не го коментираа нападот.