Украина: Седуммина загинати, 47 повредени во руски напад врз западниот град Лавов

ИСТАНБУЛ (АА) - Најмалку седум лица загинаа, а 47 се повредени денес во рускиот воздушен напад во текот на ноќта врз западниот украински град Лавов, јавува Анадолу.

„Веќе изгубивме седум лица. Меѓу нив има три деца. Страшна трагедија“, рече гувернерот на Лавов, Максим Козицки, на Телеграм.

Подоцна Козицки изјави дека биле оштетени регионалниот спортски и рехабилитационен центар и седум архитектонски споменици во градот.

Понатаму тој рече дека 47 лица што се повредени во нападот се згрижени во три медицински установи во градот.

„Меѓу пациентите има седум деца. Сите се со умерени повреди. Најмалку седуммина од возрасните се во тешка состојба“, додаде тој.

Градоначалникот на Лавов, Андриј Садови, на Телеграм напиша дека избувнале пожари во голем број станбени згради во близина на главната железничка станица во градот.

Тој рече дека во градот нема да работат и две училишта, додавајќи дека во многу згради се искршени стаклата на прозорците.

Воздухопловните сили на Украина тврдат дека противвоздушната одбрана на земјата соборила седум од 13 проектили од различен тип и 22 од 29 беспилотни летала за напад лансирани од Русија во текот на ноќта.

Се наведува дека украинската противвоздушна одбрана работела во текот на ноќта во регионите Лавов, Ивано-Франковск, Чернихив, Дњепропетровск, Волин, Тернопил, Киев, Житомир, Полтава и Суми, додавајќи дека беспилотно летало преминало и во соседна Белорусија.

Руските власти сѐ уште не го коментираа нападот.