УНРВА: Најмалку 176 наши работници се убиени во израелските напади од почетокот на војната во Газа

ГАЗА (АА) - Агенцијата на Обединетите нации за палестинските бегалци (УНРВА) соопшти дека од почетокот на израелските напади на Појасот Газа досега се убиени 176 нејзини работници, известува Анадолу.

„Хуманитарните работници не се цел и мораат да бидат заштитени во секој момент. Израел и понатаму ѝ оневозможува на УНРВА пристап и достава на помош во северниот дел на Појасот Газа“, објави раководството на УНРВА на социјалната мрежа Х.

Портпаролот на Обединетите нации (ОН), Стефан Дујарик, вчера рече дека најмалку 196 хуманитарни работници се убиени во Појасот Газа од 7 октомври.

Дујарик ја опиша палестинската територија како „едно од најопасните места на светот за работа“ за хуманитарните работници.

УНРВА е најголема хуманитарна организација во Газа и се смета за столб на операциите за хуманитарната помош во Газа.

По обвинувањата дека некои од членовите на агенцијата на ОН се вмешани во нападот на Хамас на Израел, најмалку 17 земји, вклучувајќи ги и САД, Велика Британија, Австралија и голем број земји од Европската Унија, ја запреа поддршката на УНРВА.

Неколку земји, вклучувајќи ги Франција, Шведска, Канада и Јапонија, минатиот месец најавија дека ќе ја продолжат поддршката на УНРВА.