Францускиот министер за надворешни работи како провокации ги оцени заканите на израелскиот премиер кон Либан

АНКАРА (АА) - Францускиот министер за надворешни работи, Жан-Ноел Баро, ги опиша заканите на израелскиот премиер кон Либан како „провокации“, пренесува Анадолу.

„Доколку тие провокации станат реални, тоа би го одвлекло Либан, пријателска земја на Франција, и онака толку кревка, во хаос“, изјави Баро за телевизијата Франс 2 во синоќешното интервју.

Во снименото видео објавено вчера, израелскиот премиер Бенјамин Нетанјаху му се обрати на либанскиот народ и упати големи критики за Хезболах.

Тој го предупреди либанскиот народ пред нивната земја „да падне во амбисот на долга војна што ќе доведе до деструкција и страдање како што гледаме во Газа“.

Ова, исто така, би предизвикало повеќе безбедносни проблеми за Израел, рече Баро, нагласувајќи дека ситуацијата во Либан е веќе „катастрофална“.

Францускиот министер предупреди дека регионот е на раб на прелевање и нагласи: „Ова прелевање е наша грижа, ги засега сите Французи.“

Во овој контекст, Баро повика на имплементирање на дијалогот и дипломатијата наместо силата за решавање на конфликтот.

Израел продолжува со воздушните и копнените напади врз Либан, истовремено изведувајќи напади врз Газа.

Се зголемуваат стравувањата дека континуираната ескалација може да доведе до сеопфатна војна во регионот.