Шест Палестинци загинаа во израелски бомбардирања во Џенин на окупираниот Западен Брег

Најмалку шест Палестинци беа убиени изутрина кога Израел бомбардираше место за собир на цивили во Џенин кој се наоѓа во окупираниот Западен Брег, пренесува Анадолу.

Во соопштението, палестинското Министерство за здравство рече: „Шест Палестинци загинаа кога израелската окупација бомбардираше собир на граѓани во Џенин“.

Израелската армија бомбардираше јавен собир на плоштадот на мачениците во близина на градот Џенин на Западниот Брег, изјавија очевидци за Анадолу.

Очевидци рекоа дека бомбардирањето резултирало со многу жртви, а човечки останки биле расфрлани на местото на настанот, додека повредените биле пренесени во болница во Џенин.

Убиен израелски полицаец во рација

Претходно, во рано утринските часови, израелските сили упаднаа во градот Џенин, вклучувајќи го неговиот бегалски камп и неколку населби. Според очевидци, се слушнале звуци од пукотници и експлозии.

Очевидци велат дека хеликоптер го бомбардирал кампот, но таму нема жртви.

Најмалку еден израелски полицаец е убиен поради повреди здобиени за време на рацијата.

Најмалку четворица израелски офицери се повредени во експлозија за време на рацијата, а двајца се здобиле со сериозни повреди, се вели во заедничкото соопштение на израелската армија и полиција.

Ранетите погранични полицајци биле однесени во болница во северен Израел, каде повредената Шеј Гермај, офицерка, била пријавена мртва, се вели во подоцнежната заедничка изјава.

Жртвите дојдоа од експлозија на направа покрај патот додека возило на израелските сили се наоѓало на лице место за време на рацијата.

Сликите на социјалните мрежи покажаа дека возилото на израелските сили се превртело поради ударот на експлозијата.

Тензиите се високи низ Западниот Брег откако избија борби во Газа на 7 октомври меѓу палестинските групи и Израел.

Бројот на палестински жртви на Западниот Брег, вклучувајќи го и Источен Кудс (Ерусалим), е најмалку 330, според податоците на Министерството за здравство.

Од 7 октомври, израелските напади на Западниот Брег ескалираа истовремено со разорната војна против Газа, во која загинаа најмалку 22.722, а беа повредени околу 58.166, повеќето жени и деца.

Според властите во Појасот Газа и ОН, конфликтот предизвика и голема штета на инфраструктурата и хуманитарна катастрофа без преседан.

Израел започна немилосрдни воздушни и копнени напади врз Појасот Газа по прекуграничниот напад на палестинската група на отпор, Хамас, на 7 октомври.

Оттогаш се убиени најмалку 22.722 Палестинци, а 58.166 повредени, според здравствените власти на Газа. Според официјалните бројки, речиси 1.200 лица загинаа во Израел.

Нападот ја остави Газа во урнатини, при што 60 отсто од инфраструктурата на енклавата е оштетена или уништена, а речиси 2 милиони жители се раселени поради сериозен недостиг на храна, чиста вода и лекови.