Шефот на ОН: Потрагата по храна не смее да биде смртна пресуда за Палестинците во Газа

ХАМИЛТОН (АА) - Генералниот секретар на Обединетите нации (ОН), Антонио Гутереш, денес предупреди на растечката хуманитарна катастрофа во Појасот Газа, нагласувајќи дека „потрагата по храна“ не треба да биде „смртна пресуда“, јавува Анадолу.

„Конфликтот меѓу Израел и Иран доминираше во насловите. Но, не можеме да дозволиме страдањето на Палестинците во Газа да биде турнато во сенка“, рече Гутереш на прес-конференција во седиштето на ОН во Њујорк. „Прекинот на огнот постигнат меѓу Иран и Израел нуди надеж. А надежта е попотребна од кога било“.

Повикувајќи на итна акција за овозможување влез на хуманитарна помош, тој рече: „Потрагата по храна никогаш не смее да биде смртна пресуда. Да бидам јасен: Израел, како окупаторска сила, е должен да се согласи и да ја овозможи хуманитарната помош“.

Гутереш ја нагласи потребата од итни и практични решенија за хуманитарната помош да стигне до оние на кои им е потребна. „Ни требаат конкретни акции за да може помошта да стигне до сите луѓе - брзо, во големи количини, каде и да се. Секоја операција што ги насочува очајните цивили во милитаризирани зони по својата природа е небезбедна. Ги убива луѓето“, рече тој.

„Проблемот со дистрибуцијата на хуманитарната помош мора да се реши. Нема потреба од повторно измислување на тркалото со опасни шеми“, додаде шефот на ОН.

Гутереш нагласи дека ОН го имаат „решението - детален план заснован на хуманитарните принципи на хуманост, непристрасност, неутралност и независност“, посочувајќи: „Имаме залихи. Имаме искуство“.