Шефот на Пентагон потврди дека САД ја „паузираат“ воената помош за Украина

Секретарот за одбрана на Соединетите Американски Држави, Пит Хегсет, денеска потврди дека Соединетите Американски Држави (САД) ја суспендирале воената помош за Украина која се соочува со војна, известува Анадолу.

„Како што истакна претседателот, тоа е пауза. Токму она што тој го зборуваше од самиот почеток. Пауза во очекување на вистинска посветеност на патот кон мирот“, им рече Хегсет на новинарите пред разговорите со неговиот британски колега Џон Хили во Пентагон.

Хегсет рече дека американскиот претседател Доналд Трамп внимателно следи што велат и прават Украинците во контекст на нивната посветеност на мировниот процес.

„Многу сме охрабрени од знаците што ги гледаме. На крајот, тој ќе донесе одлука, но засега има пауза“, додаде Хегсет.

Тензиите меѓу САД и Украина ескалираа минатата недела по контроверзната средба на Зеленски со Трамп во Белата куќа, по што САД најавија пауза во давањето помош за Украина.