Alperen Aktaş,Riyaz Khaliq Khaliq
09 Август 2024•Ажурирај: 11 Август 2024
ИСТАНБУЛ (АА) – Јапонскиот град Нагасаки денес ја одбележа 79-годишнината од фрлањето на атомската бомба од страна на Соединетите Американски Држави во 1945 година, притоа одбивајќи да го покани Израел на церемониите поради неговата континуирана војна против Газа, јавува Анадолу.
Во 11:02 часот по локално време, точниот момент кога американскиот авион Б-29 ја пушти бомбата над Нагасаки, градот замолкна во знак на сеќавање.
Трагичниот настан на крајот на Втората светска војна е особено значаен бидејќи Нагасаки остана последно место во историјата што претрпи напад со атомска бомба.
„Владата на Јапонија, единствена држава нападната со атомски бомби во војна, мора да изрази сериозен став за свет без нуклеарно оружје“, рече градоначалникот на Нагасаки, Широ Сузуки, на церемонијата по повод годишнината.
„Како чекор кон ова, ја повикуваме јапонската Влада да го потпише и ратификува Договорот за забрана на нуклеарното оружје колку што е можно поскоро“, рече тој, објави јапонскиот дневен весник „Мајничи“.
Исто така, тој ја повика јапонската Влада „цврсто да го поддржува принципот на мир отелотворен во Уставот на Јапонија и да го покаже своето лидерство во меѓународните напори за ублажување на зголемените тензии во Североисточна Азија и да се продолжи кон разоружување во регионот, како што е Иницијативата за зона без нуклеарно оружје на Североисточна Азија“.
Пред комеморацијата Нагасаки одлучи да не го покани Израел на настанот и покрај притисокот од Групата на седум земји (Г7).
Градоначалникот рече дека одлуката е донесена за да се осигурат безбедноста и мирот за време на настанот.
Одлуката „не е политички мотивирана“, додаде тој.
Централната Влада на Јапонија, една од членките на Г7, одби да ја коментира одлуката на Нагасаки да не покани израелски претставници.
Амбасадорот на САД во Јапонија, Рам Емануел, и британската амбасадорка во Јапонија, Џулија Лонгботом, не присуствуваа на церемонијата оваа година како одговор на тоа што Нагасаки не го покани Израел.
Неприсуството на двете земји вчера предизвика протести пред нивните дипломатски претставништва во Токио.
- Хирошима, Русија и Белорусија -
Хирошима, која беше бомбардирана од САД на 6 август 1945 година, ги покани израелските власти на својот настан во вторникот, предизвикувајќи широки критики.
Од почетокот на руската војна против Украина во февруари 2022 година, Русија, како и Белорусија, исто така, се исклучени од настанот.
Активистите за мир и поддржувачите на Палестина остро ја критикуваа Хирошима за нејзините двојни стандарди.
На настанот во Нагасаки учествуваа околу 2.300 гости, вклучително и претставници од 100 земји, меѓу кои и од Палестина.
Но амбасадорите на земјите од Г7, меѓу кои САД, Велика Британија, Франција, Германија, Канада, Италија и Европската Унија, не присуствуваа на церемонијата.
Генералниот секретар на Обединетите нации, Антонио Гутереш, преку платформата X истакна: „Поминаа скоро 80 години откако Нагасаки беше запален со атомско оружје. Не е доволно да се потсетиме што се случи“, додаде тој.
