Јужнокорејската и американската морнарица започнаа уште една заедничка поморска вежба

АНКАРА (АА) - Морнариците на Јужна Кореја и на Соединетите Американски Држави (САД) денеска започнаа уште една дводневна комбинирана поморска вежба за маневрирање во водите на источноазиската земја, објавија локалните медиуми, пренесува Агенција Анадолија (АА).

Во вежбите учествува и американскиот носач на авиони на нуклеарен погон, кој се врати во водите на Јужна Кореја поради зголемените тензии на Корејскиот Полуостров по неодамнешното лансирање на проектили од Северна Кореја.

„Морнариците на сојузниците ги започнаа дводневните поморски маневрирачки вежби во меѓународните води на Источното Море со план подоцна да организираат операции за придружба на УСС „Роналд Реган“ до водите југоисточно од јужниот остров Џеџу“, објави новинската агенција „Јонхап“, повикувајќи се на изјавата на Здружениот генералштаб (JCS).

„Јужна Кореја го распореди разурнувачот „Мунму Големиот“ и фрегатата „Донгае“ за вежбите, додека САД го распоредија носачот на авиони УСС „Ченселорсвил“, крстосувач со наведувани ракети од класата Тикондерога; и УСС „Бари“, разурнувач на наведувани проектили од класата Арли Бурк“, се вели во соопштението.

Најновите заеднички вежби започнаа еден ден откако 12 севернокорејски воени авиони полетаа во формација за вежба за гаѓање воздух-земја. Според медиумот, тоа е реакција на неодамнешните воени вежби меѓу Јужна Кореја и САД.

Како одговор, полетаа околу 30 јужнокорејски борбени авиони.

Северна Кореја, од друга страна, го осуди повторното распоредување на американскиот носач на авиони на нуклеарен погон во јужнокорејските води и го нарече „сериозна закана за стабилноста на ситуацијата на Корејскиот Полуостров“.

Во меѓувреме, јужнокорејскиот претседател Јун Сук-Јол вчера исто така телефонски разговараше со јапонскиот премиер Фумио Кишида и се согласи цврсто да одговори на нуклеарните и ракетните провокации на Северот преку тесна трилатерална соработка меѓу нивните земји и САД, според „Јонхап“.

„Ние го споделивме разбирањето дека ако односите меѓу Јужна Кореја и Јапонија се вратат во добрите времиња од минатото на почетокот и размената меѓу бизнисите и меѓу нашите луѓе стане непречена, тоа ќе биде од голема помош за економиите на двете земји“, рече Јун.

Jужнокорејската војска соопшти дека САД ќе го прераспоредат својот носач на авиони на нуклеарен погон во водите на Јужна Кореја по лансирањето на балистичка ракета од страна на Северна Кореја.

Тензиите на полуостровот се зголемија во 2020 година кога Северна Кореја ја нападна и ја разнесе меѓукорејската канцеларија за врски долж границата. Сеул се закани со силен одговор доколку Пјонгјанг „дополнително ја влоши ситуацијата“.

Сепак, тензиите дополнително се зголемија минатата година кога и Сеул и Пјонгјанг ги зајакнаа воените вежби за да ја покажат својата моќ.