Џо Бајден: „Путин мислеше дека Украина е слаба, но е поразен“

ВАРШАВА (АА) - Претседателот на Соединетите Американски Држави (САД) Џо Бајден изјави дека рускиот претседател Владимир Путин мислел дека Украина е слаба, но дека е поразен во војната што се води во таа земја, јавува Анадолија (АА).

Бајден ненадејно го посети Киев, главниот град на Украина, пред неговата посета на Полска, за да покаже поддршка за земјата разурната од војна.

„Путин мислеше дека Западот е поделен, а Украина е слаба. Мислеше дека може да издржи подолго од нас. Тој е поразен. По една година, ние сме тука со украинскиот народ“, рече Бајден во пораката што ја објави на социјалната мрежа Твитер.

За време на престојот во Киев, тој најави нов пакет воена помош за Украина во вредност од 500 милиони долари.

„Заедно, обезбедивме речиси 700 тенкови, илјадници оклопни возила, 1.000 артилериски системи, повеќе од два милиони куршуми артилериска муниција, повеќе од 50 напредни ракетни системи за лансирање, системи за противбродска и противвоздушна одбрана. Сѐ за одбрана на Украина. И тоа не спаѓа во другите половина милијарда долари што ќе ви ги дадеме денес и утре“, рече Бајден на прес-конференција со неговиот украински колега Владимир Зеленски.

Бајден најави испорака на артилериска муниција за ХИМАРС и хаубици, како и противтенковски ракетни системи Џавелин, радари за надзор, сѐ со цел да се „заштити украинскиот народ“.

За време на посетата на Киев, тој најави помош од милијарди долари во буџетот на Украина за пружање услуги на граѓаните.

„Колку и да е потребно. Борбата за слобода е вредна за борба“, рече Бајден.

Бајден, исто така, истакна дека Вашингтон оваа недела ќе воведе дополнителни санкции за руските компании и елити кои се обидуваат да ги избегнат санкциите воведени кон Москва, велејќи дека неговото присуство во Киев ја покажува американската поддршка за независноста, суверенитетот и територијалниот интегритет на Украина.