Melike Pala
14 Октомври 2025•Ажурирај: 15 Октомври 2025
БРИСЕЛ (АА) - Италија е поблиску до признавање на државата Палестина по договорот за прекин на огнот во Газа меѓу Израел и Хамас, изјави денес италијанската премиерка Џорџа Мелони, јавува Анадолу.
„Јасно е дека, доколку планот се спроведе, признавањето на Палестина од страна на Италија сигурно ќе биде поблиску“, изјави Мелони за новинарите на маргините на мировниот самит во Шарм ел Шеик во Египет, според новинската агенција АНСА.
Таа нагласи дека Италија има за цел да го поддржи воспоставувањето палестинска држава, а воедно да продолжи со хуманитарната поддршка за народот во Газа.
Мелони истакна дека Италија е подготвена да помогне во стабилизирањето на Газа, вклучително и распоредување на карабинери, доколку тоа го бара резолуцијата на ОН.
„Италија е подготвена да го направи својот дел. Тоа е одлична можност. Тоа е историски ден. Горда сум што Италија е тука“, рече таа.
Мелони го опиша договорот за прекин на огнот како „голем успех“ за американскиот претседател Доналд Трамп, додавајќи: „Му посакуваме уште (успеси), почнувајќи од Украина“.
Минатата недела, Трамп објави дека Израел и палестинската група Хамас се согласиле со првата фаза од планот што го изложи на 29 септември за воведување прекин на огнот во Газа, ослободување на сите израелски заробеници во замена за палестински затвореници и постепено повлекување на израелските сили од целиот Појас Газа. Првата фаза од договорот стапи на сила во петокот.
Втората фаза од планот предвидува воспоставување нов управувачки механизам во Газа, формирање мултинационални сили и разоружување на Хамас.
Претходно вчера, ослободувањето на палестинските затвореници започна откако Хамас ги ослободи сите 20 живи израелски заробеници држени во Појасот Газа.
Од октомври 2023 година, во израелските напади се убиени над 67.800 Палестинци во енклавата, повеќето од нив жени и деца, а енклавата стана во голема мера непогодна за живот.
