Норвешката фудбалска федерација побара оставка од претседателот на ФИФА, Џани Инфантино

Претседателката на Норвешката фудбалска федерација (НФФ), Лисе Клавенес, денес побара оставка од претседателот на ФИФА, Џани Инфантино, оценувајќи дека тој ја изгубил довербата на федерацијата, јавува Анадолу.

„Одлучивме дека повеќе немаме доверба во Инфантино“, изјави Клавенес за „Гардијан“ по месечната седница на Управниот одбор на НФФ.

„Постојано бевме загрижени и секоја година, во секој период од годината, имаше уште еден чекор во погрешна насока. Довербата за нас сега е изгубена и нема враќање назад за Инфантино“, додаде таа.

Нејзините коментари доаѓаат во време кога притисокот врз Инфантино продолжува да расте, и покрај извинувањето на ФИФА за начинот на кој беше постапувано со неуспешниот предлог за продажба на удел во комерцијалните права на натпреварувањата на ФИФА, вклучувајќи го и Светското првенство.

УЕФА вчера соопшти дека условите за повлекување на предложениот бојкот на натпреварувањата на ФИФА, меѓу кои и Светското првенство, не се исполнети, и покрај тоа што предлогот беше повлечен, а ФИФА подоцна се извини.

ФИФА во средата се извини за пропустите поврзани со предлогот, кој предвидуваше формирање подружница проценета на 20 милијарди долари што ќе управува со комерцијалните права и организацијата на Светското првенство и другите натпреварувања.

Планот предвидуваше на приватни инвеститори да им биде понуден удел до 20 проценти во подружницата, но беше повлечен поради широкото противење.