„Лицемерната политика на западните сили е причина за смелоста на Израел“

АНКАРА (АА) - Претседателот на Туркије, Реџеп Таип Ердоган, во своето обраќање пред нацијата по седницата на Кабинетот на Владата во Анкара изјави дека турските граѓани во периодот што следува можат да очекуваат позитивни ефекти од економската програма на актуелната Влада, известува Анадолу.

„Јасно ќе ги видиме позитивните ефекти од нашата економска програма на многу полиња во периодот што следува, особено во поглед на инфлацијата“, рече Ердоган, додавајќи дека на состанокот детално се разговарало за многу важни прашања, особено за економијата, образованието, борбата против тероризмот и надворешната политика.

Ердоган истакна дека Република Туркије одлучно чекори напред кон остварувањето на зацртаните цели, додека многу развиени земји и земји во развој се соочуваат со сериозни закани, како што се политичка нестабилност и социјални тензии.

„Само на полето на туризмот 2023 година беше најдобра година во нашата историја. Нашите приходи од туризмот пораснаа за 17% во 2023 во однос на претходната година, достигнувајќи 54,3 милијарди долари“, посочи претседателот на Туркије.

Тој додаде дека во јануари е продолжен напредокот и во контекст на извозот.

„Нашиот извоз во јануари е зголемен за 3,6% во однос на истиот месец минатата година, достигнувајќи 20 милијарди долари. Со тоа го достигнавме најголемиот извоз во јануари во нашата историја“, рече Ердоган.

Претседателот Ердоган ги коментираше и израелските напади врз Појасот Газа и ја обвини Владата на Бенјамин Нетанјаху дека го имитира Хитлер и дека секојдневно ја преминува границата во брутална политика на масакр што ја води од 7 октомври.

Осудувајќи ја агресијата на Израел врз градот Рафа на југот на Појасот Газа, вклучително и планираната офанзива, Ердоган рече дека „лицемерната политика на западните сили“ е причина за смелоста на Израел.

„Додека западните сили јавно го повикуваат Израел на воздржаност, истовремено ги затвораат очите пред Нетанјаховите злосторства, криејќи се зад Хамас како изговор“, истакна Ердоган.

Вети дека ќе ја продолжат борбата против тероризмот уште во неговиот извор и по секоја цена ќе го спречат „Терористан“ по должината на јужната граница на Туркије.

Претседателот Ердоган се осврна и на одлуката на американската администрација за продажба на модернизираните авиони Ф-16 на Република Туркије.

„Задоволни сме од позитивниот одговор на нашето барање за Ф-16 за што веќе некое време разговараме со САД. Со укинувањето на ограничувањата за нашата земја, се надеваме дека турската одбранбена индустрија отсега уште побрзо ќе напредува“, рече претседателот на Туркије, Реџеп Таип Ердоган.