Алтун: „Турција најмногу настрада од кампањите за дезинформации“

ИСТАНБУЛ (АА) - Турција е земјата која најмногу настрада од глобалниот проблем со дезинформациите, изјави денес челникот на Одделот за комуникации при турското Претседателство, Фахретин Алтун, јавува Агенција Анадолија (АА).

Говорејќи на отворањето на работилниците за стратешка комуникација и борба против дезинформациите, Алтун рече дека Турција е во фокусот на кампањите за дезинформации на меѓународната сцена.

Цитирајќи студија спроведена во 2018 година од Институтот за проучување на новинарството на „Ројтерс“, Алтун рече дека Турција е земјата која најмногу го искусила овој глобален проблем со дезинформациите.

„Турција претрпе процес на трансформација, благонаклонет за турската нација и нејзините национални интереси“, рече тој, додавајќи дека постои силен сојуз на меѓународни актери за елиминирање на придобивките на Турција преку дезинформациите.

Истакнувајќи дека дезинформациите во современите демократии првенствено се користат за создавање социјален хаос, политичка нестабилност и економска криза, Алтун истакна дека сите тие алатки се користат за „да се создаде можност за странско интервенирање“.

Тој рече дека Турција е жртва на кампањите за дезинформации на терористички организации, странски држави, субдржавни актери, мултинационални компании и меѓународни невладини организации.

Алтун потенцираше дека политиката на дезинформации е процес што носи гетоизација и поларизација во социјалната, политичката и културната сфера и дека тоа е елемент кој ѝ штети на општествената структура, националното единство и интегритет.

„'Национална должност' е да се спречат дезинформациите“, додаде Алтун.