Ердоган: Газа им припаѓа на Палестинците исто како Западниот Брег и Источен Ерусалим

ИСТАНБУЛ (АА) - Турскиот претседател Реџеп Таип Ердоган порача дека Појасот Газа им припаѓа на Палестинците, исто како и Западниот Брег и Источен Ерусалим, јавува Анадолу.

„Исто како и Источен Ерусалим и Западниот Брег, Газа им припаѓа на Палестинците. Со Божја волја, нашите браќа и сестри во Газа ќе продолжат да живеат засекогаш на земјата каде што се родени“, рече Ердоган во обраќањето по состанокот на Кабинетот во главниот град Анкара.

Осврнувајќи се на злосторствата на Израел во Газа, Ердоган нагласи дека ништо не може да се постигне во Газа преку тековното крвопролевање од страна на Израел и прекинувањето на испораката на храна и медицинска помош.

„Сега мора да се признае дека не може да се стигне до ниту едно место во Газа со понатамошно пролевање крв, убивање повеќе деца и оставање на луѓето гладни, жедни и без лекови“, рече тој.

Во однос на неодамнешните тензии помеѓу Индија и Пакистан, турскиот претседател истакна дека Туркије сака нивна деескалација „што е можно поскоро, пред ситуацијата да стане посериозна“.

„Како Туркије, во секоја прилика потенцираме дека не сакаме нови конфликти во нашиот регион и пошироко“, заклучи турскиот претседател.

Тој на крајот изрази сочувство за Иранците кои загинаа во експлозијата на пристаништето во близина на градот Бандар Абас, во јужен Иран, во која животот го загубија најмалку 40 лица, а над 1.000 беа повредени.