Ердоган најави дека Туркије утре ќе ја предаде документацијата за приклучување кон тужбата против Израел за геноцид

ИСТАНБУЛ (АА) - Претседателот на Република Туркије, Реџеп Таип Ердоган, најави дека оваа недела земјата ќе ги поднесе потребните барања за вклучување во процесот на тужбата за геноцид против Израел пред Меѓународниот суд на правдата, јавува Анадолу.

„Во среда нашиот парламентарен правен тим ќе ја поднесе нашата петиција и досието за приклучување кон случајот за геноцид против Израел до Меѓународниот суд на правдата во Хаг“, рече Ердоган во обраќањето до нацијата по седницата на Кабинетот во Анкара.

Ердоган најави и дека во наредниот период турските власти ќе продолжат да го поддржуваат деловниот свет со добро проучени нови пакети што ќе придонесат за турската економија.

Тој ги коментираше и меѓународните теми, велејќи дека војната меѓу Русија и Украина трае веќе две и пол години и дека крајот на конфликтот сѐ уште не се гледа на хоризонтот и дека Туркије сѐ уште се залага за мирно решение преку дијалог.

Тој најостро ги осуди континуираните израелски напади врз Појасот Газа, како и атентатот врз лидерот на Хамас, Исмаил Ханије, во Техеран.

„Туркије прави сѐ што е во нејзина моќ што побрзо да стави крај на варварството што ги однесе животите на 40.000 невини луѓе во Газа во последните десет месеци“, рече Ердоган.

Тој нагласи дека Република Туркије со сите свои ресурси стои покрај Палестина и палестинскиот народ во овие тешки денови на борбата за нивна егзистенција.

„Без оглед на злосторствата што ги прави оваа крвожедна мрежа на геноцид, тоа нема да ги спречи Туркије и турскиот народ да застанат во солидарност со Палестинците“, порача Ердоган.

Турскиот претседател, исто така, рече дека западните актери, предводени од САД, станале „заложници“ на Израел и шака фанатични ционисти.

Во оваа пригода Ердоган ѝ се заблагодари на турската разузнавачка служба (МИТ) за минатонеделната успешна меѓународна размена на затвореници, која беше спроведена во Анкара со учество на седум земји и која се смета за најголема таква размена од завршувањето на Втората светска војна.

Тој потсети дека се разменети 26 лица од затворите во САД, Германија, Полска, Словенија, Норвешка, Русија и Белорусија и дека МИТ извршил беспрекорна операција и му дал одличен пример на светот.