Калин: „Извозот на жито од Украина би можел да продолжи наскоро“

АНКАРА (АА) - Извозот на жито од украинските пристаништа би требало да продолжи во рок од две недели по неодамнешниот договор постигнат во Истанбул, изјави портпаролот на турското Претседателство, Ибрахим Калин, пренесува Агенција Анадолија (АА).

„Испораката на жито е во корист и на Русија и Украина. Можеме да очекуваме првите бродови да пловат за две недели. Зависи и од тоа колку се подготвени земјите [Русија и Украина]“, изјави Калин во интервју за „Блумберг“.

Туркије, Обединетите нации (ОН), Русија и Украина минатата недела потпишаа договор за повторно отворање на трите украински пристаништа - Одеса, Черноморск и Јужни - за житото со месеци заглавено поради тековната Руско-украинска војна, која веќе влезе во шестиот месец.

Договорот се случи откако беше постигнат општ договор меѓу засегнатите страни за планот предводен од ОН за време на разговорите на 13 јули за формирање координативен центар во Истанбул за да се извршат заеднички инспекции на влезот и излезот од пристаништата и да се осигура безбедноста на рутите.

„Постигнат е важен договор за испорака на жито, и покрај потешкотиите. Слично на тоа, прекин на огнот и мировни преговори може да се постигнат преку сличен процес“, рече Калин.

Тој ја поздрави балансирачката улога на Туркије меѓу Москва и Киев што доведе до договорот за жито, велејќи: „Ние ќе ја продолжиме политиката на баланс меѓу Русија и Украина. Кога започна војната, реков ’Кој ќе разговара со Русите на крајот на денот ако сите ги запалат мостовите?‘“

Истакна дека количеството жито во рацете на Русија и Украина се очекува да биде меѓу 40 и 50 милиони тони до крајот на годината.

Калин рече дека договорот е валиден четири месеци и автоматски ќе биде обновен.