Потпретседателот на Туркије Октај даде информации во врска со земјотресите во Туркије

АНКАРА - Според најновите информации добиени од турските власти, најмалку 3.419 лица ги загубија животите, а 20.534 се повредени во земјотресите што вчера ги потресоа јужните делови на Туркије, известува Анадолу.

Потпретседателот на Туркије Фуат Октај на конференцијата за новинарите во Анкара ги сподели најновите информации за бројката на настрадани во земјотресите во Туркије, со епицентар во турската област Кахраманмараш.

Октај соопшти дека бројката на загинати се зголемила на 3.419, повредени се 20.534 лица, а од урнатините во турските градови живи се извлечени повеќе од 8.000 лица.

Потпретседателот на Туркије Октај сподели и други податоци во врска со бројката на странски тимови за претрага и спасување, кои пристигнале во Туркије.

„Засега 3.294 лица, членови на тимови за претрага и спасување, дојдоа од други земји. Повеќе од 70 земји поднесоа барања, од кои 14 веќе се на терен“, информираше Октај.

- Број на загинати во Туркије

Два силни земјотреси, првиот со интензитет од 7,7 степени по Рихтер вчера наутро во 4:17 часот со епицентар во округот Пазарџик и вториот во 13:24 часот, со интензитет од 7,6 степени по Рихтер со епицентар во местото Елбистан ги потресоа јужните делови на Туркије. Епицентарите на земјотресите се регистрирани во турската област Кахраманмараш. И турските области Газиантеп, Шанлиурфа, Дијарбакир, Адана, Адијаман, Малатја, Османие, Хатај и Килис се тешко погодени од земјотресите. Во текот на денот имаше и голем број последователни потреси со помал интензитет.

Земјотресите се почуствуваа и во соседна Сирија, но и во Ирак, Либан, Египет и други региони.

Претседателот на Туркије Реџеп Таип Ердоган изјави дека на Туркије и се случила најголемата катастрофа по земјотресот во Ерзинџан 1939 година.

Туркије прогласи седмодневна жалост поради разорните земјотреси што ја потресоа земјата.