Туркије ја започна кампањата „Солидарност на векот“ по земјотресите

АНКАРА (АА) - Одделот за комуникации при Претседателството на Туркије ја започна кампањата „Солидарност на векот“ за да го привлече вниманието на солидарноста што ја покажа турската нација по разорните земјотреси минатиот месец, јавува Анадолу.

„За да го намалиме неописливото страдање на нашите браќа и сестри во регионот на земјотресот, да ги залечиме раните и храбро и решително да се бориме со погубните последици од катастрофата, нашата држава и нација ја покажаа солидарноста на векот, што е пример за целиот свет“, изјави денес шефот на Одделот за комуникации при турското Претседателство, Фахретин Алтун.

На 6 февруари, земјотресите со јачина од 7,7 и 7,6 степени по Рихтер погодија 11 области - Адана, Адијаман, Дијарбакир, Елазиг, Хатај, Газиантеп, Кахраманмараш, Килис, Малатија, Османије и Шанлиурфа. Како последица на земјотресите загинаа над 50.000 лица.

Повеќе од 13,5 милиони луѓе во Туркије се засегнати од разорните земјотреси, како и многу други во северна Сирија.

„Ќе работиме деноноќно со сите сили за да ги оставиме овие болни денови зад себе, да ги залечиме раните на Туркије, да ги вратиме нашите граѓани во своите домови што е можно поскоро и да го обновиме и оживееме регионот“, рече Алтун.

Кампањата, која беше започната со слоганот „Заедно сме Туркије“, ја нагласува важноста на солидарноста на државата и нацијата пред неодамнешната катастрофа.

Во рамките на кампањата беше објавен и оглас за јавна услуга од страна на Дирекцијата.