Arrestohen dy mjekë për vdekjen e këngëtarit grek, Giorgos Mazonakis

Dy mjekë u arrestuan të enjten ndërsa u shtuan pikëpyetjet mbi funksionimin e një klinike private ku këngëtari grek Giorgos Mazonakis kishte shkuar për trajtim me plazmaferezë pak para se të pësonte arrest kardiak, raportoi gazeta "Kathimerini", transmeton Anadolu.

Policia greke arrestoi dy mjekët e dyshuar për përfshirje në vdekjen e Mazonakisit ndërsa ndaj tyre u ngrit një çështje për ekspozim me pasojë vdekjen, vepër e rëndë penale.

Mjekët pritet të paraqiten sot para prokurorit ndërsa hetimet vazhdojnë për të sqaruar se çfarë ndodhi në klinikë dhe rrethanat që çuan në vdekjen e Mazonakisit.

Përgjigje të mëtejshme pritet të japë autopsia e planifikuar për sot. Autoritetet i thanë gazetës greke se Mazonakis kishte mbërritur në klinikën e mjekëve dukshëm më herët se koha e deklaruar fillimisht nga mjekët. Hetuesit konstatuan mospërputhje prej të paktën tre orësh mes kohës së mbërritjes së këngëtarit dhe kohës së raportuar nga mjekët.

Vëmendje e veçantë i është kushtuar të dhënave lidhur me aparatin e plazmaferezës në klinikë. Policia përcaktoi se aparati kishte qenë në funksion për më shumë se 30 minuta, duke sugjeruar se procedura e plazmaferezës kishte nisur tashmë.

Kjo duket se bie ndesh me dëshminë e mjekëve se Mazonakis kishte humbur ndjenjat ndërsa ata po përpiqeshin t’i vendosnin një kateter të dytë intravenoz, përpara se procedura të kishte nisur.

Policia sekuestroi disa sende nga klinika, përfshirë skedarë kompjuterikë, për ekzaminim të mëtejshëm pas mospërputhjeve të konstatuara, sipas raportimeve, në deklaratat e mjekëve.