Blinken u bën thirrje për "reforma" vendeve në Afrikë

Sekretari i Shtetit të SHBA-së, Antony Blinken u bëri thirrje vendeve afrikane që të marrin parasysh paralajmërimet e shkaktuara nga krizat në Etiopi dhe Sudan dhe të zbatojnë reformat për qeveritë në kontinent, transmeton Anadolu Agency (AA).

Si pjesë e vizitës së tij në Nigeri, Blinken shkoi në selinë e Komunitetit Ekonomik të Shteteve të Afrikës Perëndimore (ECOWAS) në kryeqytetin, Abuja.

Në deklaratën e tij, Blinken iu referua politikës së administratës së presidentit amerikan Joe Biden ndaj Afrikës, duke thënë se ekstremizmi në rritje, autoritarizmi dhe korrupsioni shpërthyes në kontinent rrezikojnë demokracinë, të drejtat e njeriut dhe të ardhmen e një pjese të madhe të popullsisë së botës.

Duke deklaruar se vendet afrikane duhet t'u kushtojnë vëmendje paralajmërimeve të shkaktuara nga krizat në Etiopi dhe Sudan, Blinken u kërkoi qeverive të marrin seriozisht kërkesat popullore për një qeverisje më të mirë dhe të zbatojnë reformat.

"Ne duam t'ju japim opsione"

Blinken tha se Biden planifikon të mbajë një samit me liderët afrikanë për të demonstruar përkushtimin e Washingtonit për kontinentin.

Ai tha se SHBA-ja nuk dëshiron që vendet afrikane të kufizojnë partneritetet e tyre me vendet e zhvilluara. "Ne duam të forcojmë më tej partneritetet tuaja me ne. Ne duam t'ju ofrojmë opsione", tha Blinken.

Sekretari amerikan i cili më parë vizitoi Kenian si pjesë e turneut të tij në Afrikë, planifikon të vizitojë Senegalin pas Nigerisë.