Gjermani, një xhami ka marrë një letër kërcënuese

Një xhami në Gjermani ka marrë një letër kërcënuese, raporton Anadolu.

Letra i drejtohej Xhamisë Eyup Sulltan në qytetin Bramsche në shtetin e Saksonisë së Poshtme.

"Vazhdoni kështu. Atë që ua bëmë hebrenjve, do t'ua bëjmë edhe juve. Ajo ditë nuk është e largët", thuhej në letër.

Letra përfshinte edhe fyerje të drejtuara ndaj Islamit.

Ahmet Irmak, president i xhamisë së lidhur me Unionin Turko-Islamik për Çështjet Fetare (DITIB), tha se një xhami tjetër në rajon mori një letër kërcënuese në fillim të kësaj jave.

Të dyja letrat ishin të vulosura me NSU 2.0, duke iu referuar një grupi neo-nazist përgjegjës për një varg vrasjesh.

Irmak theksoi se një letër e ngjashme u ishte dërguar atyre rreth një vit më parë përmes postës.

Ai shprehu shqetësimin për kërcënime të tilla dhe kërkoi nga autoritetet që t'i kushtojnë vëmendje këtyre incidenteve, duke shtuar se kanë bërë kallëzim penal në polici.

Sipas DITIB-it, të paktën 35 xhami u sulmuan në Gjermani vitin e kaluar. Shumica e këtyre sulmeve janë të motivuara nga islamofobia dhe ekstremizmi i krahut të djathtë në vend.