Greqi, sulmohet me mjet shpërthyes Lozha e Madhe e Masonëve

Ndërtesa e Lozhës së Madhe Masonike të Greqisë është sulmuar me një shpërthyes të improvizuar, transmeton Anadolu.

Televizioni Shtetëror Grek (ERT) raportoi se është kryer sulm me një mjet shpërthyes në orën 06:30 sipas kohës lokale përballë ndërtesës së Lozhës së Madhe Masonike në kryeqytetin Athinë.

Mësohet se sulmuesit kanë telefonuar dhe kanë raportuar se "do të ketë shpërthim", por mjeti shpërthyes ka eksploduar para se ekspertët të mbërrinin në vendngjarje.

Zjarrfikësit kanë ndërhyrë për shuarjen e zjarrit. Ndërsa nga incidenti nuk ka patur viktima apo të plagosur, por janë regjistruar dëme të shkaktuara.

Si rezultat i hetimeve, brenda godinës u gjet një kuti e dytë e dyshimtë. Kutia u asgjësua nga ekipet kompetente.

Zona ku ndodhi shpërthimi është mbyllur për qarkullim dhe ka nisur një hetim i detajuar.