Mücahit Oktay
23 Shkurt 2022•Përditësim: 23 Shkurt 2022
Kanadaja njoftoi se ka marrë vendim për sanksione të reja ndaj Rusisë si përgjigje ndaj vendimit për njohjen e qeverive të ashtuquajtura të separatistëve në lindje të Ukrainës dhe dërgimin e ushtarëve në rajon, transmeton Anadolu Agency (AA).
Kryeministri i Kanadasë, Justin Trudeau, në një konferencë për media njoftoi se do të zbatojnë sanksione ndaj Rusisë e cila duke mos respektuar integritetin territorial të Ukrainës ka njohur të ashtuquajturën "pavarësinë" e rajoneve Donetsk dhe Luhansk.
"Provokimet arrogante të Rusisë janë një kërcënim për sigurinë dhe paqen në botë", tha Trudeau, i cili informoi se Kanadaja për të mbështetur NATO-n përballë "agresivitetit rus" ka dërguar rreth 460 anëtarë të Forcave të Armatosura të Kanadasë në Letoni dhe zonën përreth.
Kryeministri kanadez njoftoi se në fazën e parë të sanksioneve ekonomike do të ndalojë kanadezët nga të gjitha marrëveshjet financiare me rajonet separatiste Donetsk dhe Luhansk të njohura nga presidenti rus, Vladimir Putin.
Gjithashtu Trudeau theksoi se sanksionet do të vendosin në objektiv edhe anëtarët e parlamentit rus që miratojnë vendimin për njohjen e rajoneve separatiste dhe se kanadezët do të ndalohen të blejnë obligacionet shtetërore ruse.
Edhe presidenti i SHBA-së, Joe Biden, njoftoi se Washingtoni ka marrë vendim për zbatimin e "sanksioneve të bllokazhit të plotë" kundër bankës ushtarake të Rusisë dhe institucionit financiar VEB.
Washingtoni gjithashtu ka bërë të ditur se në ditët e ardhshme do të zbatojë sanksione ndaj elitave ruse dhe familjeve të tyre dhe ka paralajmëruar se do të vendosë në zbatim sanksione më të ashpra në rast se Moska vazhdon agresivitetin e saj.
Separatistët pro-rusë në lindje të Ukrainës, pavarësisht qeverisë së Kievit formuan në territoret e Ukrainës dy të ashtuquajtura administrata të ndara të emërtuara Republika Popullore e Donetskut dhe Republika Popullore e Luhanskut.
Presidenti rus të hënën nënshkroi dekretin për njohjen e administratave të fjalë të separatistëve pro-rusë në lindje të Ukrainës.
