Katari do të ndihmojë në përcaktimin e fatit të 3 pilotëve iranianë

Katari ka rënë dakord të ndihmojë në përcaktimin e fatit të tre pilotëve iranianë, vendndodhja e të cilëve mbetet e paqartë, raportoi sot agjencia shtetërore iraniane e lajmeve IRNA, transmeton Anadolu.

Rasti daton më 2 mars, kur dy avionë luftarakë iranianë "Su-24" u rrëzuan gjatë sulmeve ndaj një baze ushtarake në Katar. Irani thotë se tre pilotë u kapën të gjallë ndërsa një tjetër u vra.

Kreu i Shoqatës së Gjysmëhënës së Kuqe të Iranit, Pir Hossein Kolivand tha se kishte prova që sugjeronin se tre pilotët mund të ndodheshin në Katar dhe i kërkoi Shoqatës së Gjysmëhënës së Kuqe të Katarit të përdorte kanalet e saj për të marrë informacion mbi gjendjen e tyre.

Kolivand tha se Shoqata e Gjysmëhënës së Kuqe të Katarit duhet të kërkojë informacion për pilotët për të ndihmuar familjet e tyre, duke iu referuar rolit neutral humanitar të shoqatave të Gjysmëhënës së Kuqe dhe Kryqit të Kuq.

Zyrtarët e Shoqatës së Gjysmëhënës së Kuqe të Katarit thanë se do të ndihmojnë në ndjekjen e rastit dhe marrjen e informacionit për pilotët. Të dyja palët diskutuan gjithashtu për zgjerimin e bashkëpunimit dypalësh në operacionet e shpëtimit, trajnimeve dhe shkëmbimit të ekspertizës.