Ekip
09 Nëntor 2021•Përditësim: 09 Nëntor 2021
Një gjykatë sudaneze urdhëroi sot rivendosjen e shërbimeve të internetit në të gjithë vendin pas 15 ditësh të ndërprerjes pothuajse të plotë që nga marrja e pushtetit ushtarak muajin e kaluar, raporton Anadolu Agency (AA).
“Gjykata e Përgjithshme në Khartoum nxori një vendim për të rivendosur shërbimet e internetit pas 15 ditësh të ndërprerjes pothuajse të plotë”, raportoi gazeta private lokale, Al-Sudani, pa dhënë detaje të mëtejshme.
Më 25 tetor, kreu i këshillit ushtarak në pushtet i Sudanit, gjenerali Abdel Fattah al-Burhan, shpalli gjendjen e jashtëzakonshme dhe shpërndau Këshillin e Sovranitetit dhe qeverinë kalimtare, duke shkaktuar protesta masive në të gjithë vendin.
Ushtria gjithashtu ndërpreu shërbimin e internetit në kryeqytetin Khartoum dhe shumë pjesë të vendit.
Përpara marrjes së pushtetit nga ushtria, Sudani administrohej nga një këshill sovran zyrtarësh ushtarakë dhe civilë, i cili po mbikëqyrte periudhën e tranzicionit deri në zgjedhjet e planifikuara për vitin 2023, si pjesë e një pakti të pasigurt për ndarjen e pushtetit midis ushtrisë dhe koalicionit Forcat për Liri dhe Ndryshim.
