Në sulmin e ushtrisë izraelite në qytetin e Gazës vriten 6 palestinezë

Të paktën 6 palestinezë humbën jetën në sulmin e kryer nga ushtria izraelite në lagjen Zeitoun në jugperëndim të qytetit të Gazës, transmeton Anadolu.

Sipas agjencisë palestineze të lajmeve WAFA, avionët luftarakë izraelitë bombarduan një shtëpi në lagjen Zeitoun të qytetit të Gazës.

Nga bombardimet izraelite humbën jetën 6 palestinezë dhe shumë të tjerë u plagosën.

Një fëmijë humbi jetën në sulmin e ushtrisë izraelite në qytetin Rafah në jug të Rripit të Gazës gjatë natës dhe 7 palestinezë humbën jetën në sulmin ajror në një shtëpi në lagjen Shujaiyye në lindje të qytetit të Gazës.

Në sulmet e Izraelit në Rripin e Gazës që nga 7 tetori u vranë 37.164 palestinezë, përfshirë të paktën 15.517 fëmijë dhe 10.279 gra dhe 84.832 persona u plagosën.

Raportohet se ende ka mijëra të vdekur nën rrënoja ndërsa infrastruktura civile po shkatërrohet duke synuar spitalet dhe institucionet arsimore ku njerëzit ishin strehuar.