Papa refuzon dorëheqjen e kardinalit gjerman, kërkon reforma

Papa Françesku refuzoi sot dorëheqjen e ofruar nga kardinali gjerman Reinhard Marx rreth skandalit me abuzimet seksuale në kisha, por tha se një proces i reformës ishte i domosdoshëm dhe se çdo peshkop duhet të marrë përgjegjësinë për "katastrofën" e krizës, transmeton Anadolu Agency (AA).

Papa i shkroi një letër Marx-it në përgjigje të njoftimit të tij javën e kaluar për ofrimin e dorëheqjes së tij si kryepeshkop i Mynihut dhe Freisingut për keqtrajtimin e kishës të rasteve të abuzimit.

Papa refuzoi të pranonte dorëheqjen e tij dhe i tha Marx-it në letër se ai duhet të vazhdonte si kryepeshkop.

Ai tha se në vend të kësaj është i nevojshëm një proces i reformës "që nuk konsiston në fjalë, por qëndrime që kanë guximin të vendosin veten në krizë, por të merren me realitetin pavarësisht nga pasojat".

Letra e Papës, e shkruar fillimisht në spanjisht dhe duke përdorur një ton jozyrtar, vëllazëror, duket se i jep Marx-it mbështetje për të vazhduar me procesin e diskutueshëm të reformës së Kishës Gjermane që filloi si një përgjigje ndaj krizës së abuzimit dhe raporteve të keqtrajtimit të rasteve të abuzimit nga hierarkia gjermane gjatë dekadave.

Procesi i ashtuquajtur i reformës "Rruga Sinodale" ka shkaktuar rezistencë të ashpër brenda Gjermanisë dhe më gjerë, kryesisht nga konservatorët që kundërshtojnë hapjen e çdo debati për çështje të tilla si beqaria e priftërinjve, roli i grave në kishë dhe homoseksualiteti.

Rezistenca ka ardhur gjithashtu nga Vatikani dhe peshkopët jashtë Gjermanisë, përfshirë luftëtarët e kulturës në SHBA të cilët kanë prishur protokollin e kishës duke shkruar ese kritike për procesin e reformës gjermane.