Protestë kundër Trumpit në Bruksel pas debatit të ashpër me Zelenskyyn

Një grup qytetarësh u mblodhën në Bruksel për të protestuar kundër presidentit amerikan Donald Trump, pas debatit të tij të ashpër me presidentin ukrainas Volodymyr Zelensky në Shtëpinë e Bardhë, raporton Anadolu.

Qytetarët e mbledhur mbanin flamuj ukrainase dhe pankarta me mesazhe: “Unë jam ukrainas dhe jeta ime nuk është një kartë në lojë”, “Ndaleni Putinin” dhe “Ndaleni luftën”.

Gjatë vizitës së tij në Washington, Zelenskyy hyri në një debat të ashpër me Trumpin dhe nënpresidentin e SHBA-së JD Vance, të cilët e akuzuan vazhdimisht si mosmirënjohës për mbështetjen e amerikanëve për Ukrainën.

Lufta jodiplomatike verbale zgjati rreth dhjetë minuta në Shtëpinë e Bardhë, ndërsa Zelenskyy u përpoq të mbronte veprimet e tij në konfliktin më shumë se trevjeçar me Rusinë.

Zelensky më pas u largua nga Shtëpia e Bardhë dhe nënshkrimi i planifikuar i marrëveshjes kyç të mineraleve dhe konferenca e përbashkët për shtyp u anuluan.