Somali, kryeministri shkarkon kreun e inteligjencës

Kryeministri somalez Mohamed Hussein Roble sot ka shkarkuar kreun e Agjencisë Nacionale të Inteligjencës dhe Sigurisë (NISA), Fahad Yasin Haji, disa muaj pas vrasjes misterioze të një operatoreje femër të inteligjencës, transmeton Anadolu Agency (AA).

"Kryeministri shkarkoi kreun e Agjencisë Nacionale të Inteligjencës dhe Sigurisë Fahad Yasin dhe emëroi gjeneralmajorin Bashir Mohamed Gobe si drejtor të përkohshëm të agjencisë", thuhet në një deklaratë nga zyra e kryeministrit.

Kryeministri urdhëroi prokurorin e përgjithshëm që të hetojë vrasjen e Ikran Tahlil, agjentes femër të NISA-s e cila u vra në qershor. Familja e saj u takua me Roble mbrëmjen e së dielës në kryeqytetin Mogadishu, vetëm disa orë para shkarkimit.

Agjencia e inteligjencës tha se Tahlil u rrëmbye dhe u vra nga al-Shabaab e lidhur me al-Kaedën, por grupi terrorist thuhet se i ka mohuar akuzat.​​​​​​​