Tunizia dhe Franca diskutojnë për migracionin e parregullt dhe Gazën

Presidenti i Tunizisë, Kais Saied dhe presidenti i Francës, Emmanuel Macron diskutuan për migracionin e parregullt dhe sulmet e Izraelit ndaj Gazës, transmeton Anadolu.

Në një deklaratë nga Presidenca tuniziane bëhet e ditur se Saied zhvilloi bisedë telefonike me Macronin. Në deklaratë thuhet se dy liderët gjatë bisedës theksuan "valën e migrimit të paligjshëm (në Evropë) që po përkeqësohet çdo ditë e më shumë".

"Ajo që po ndodhë në Tunizi me fluksin e emigrantëve të parregullt nga Afrika Sub-Sahariane (për të shkuar në Evropë) nuk janë të natyrshme. Duhet të bashkohen përpjekjet për të eliminuar rrjetet kriminale që trafikojnë njerëz dhe organe", tha Saied.

Në bisedën ku u trajtuan edhe sulmet e Izraelit ndaj Gazës, dy presidentët diskutuan për "nevojën për të ndaluar luftën gjenocidale me të cilën po përballet populli i Palestinës në Gaza dhe ndalimin e menjëhershëm të kësaj lufte".