Elena Teslova
19 Shkurt 2025•Përditësim: 19 Shkurt 2025
Presidenti ukrainas Volodymyr Zelenskyy akuzoi homologun e tij amerikan Donald Trump se ka mbetur në një "hapësirë dezinformimi", duke thënë se ai shpreson që ekipi i Trumpit të ketë një kuptim më të qartë të asaj që ai e quajti "e vërteta për Ukrainën", raporton Anadolu.
Duke folur në një konferencë shtypi në Kiev, Zelenskyy hodhi poshtë komentet e fundit të Trumpit që sugjeronin se vlerësimi ndaj punës së presidentit ukrainas në vendin e tij është vetëm 4 për qind.
"Ne e kemi parë këtë dezinformim dhe e kuptojmë se e ka origjinën nga Rusia. Kemi prova që këto shifra po diskutohen mes përfaqësuesve amerikanë dhe rusë. Fatkeqësisht, Trump është i bllokuar në këtë hapësirë dezinformimi", tha Zelenskyy.
Ai akuzoi Trumpin se ka ndihmuar presidentin rus Vladimir Putin në përpjekjet e tij për të dobësuar izolimin ndërkombëtar ndaj Rusisë për shkak të luftës në Ukrainë dhe çështje të tjera.
Zelenskyy kritikoi gjithashtu Sekretarin amerikan të Shtetit Marco Rubio për referimin ndaj situatës në Ukrainë si “konflikt” dhe jo “luftë”, duke thënë se kjo sinjalizon një “zbutje” të qëndrimit të Washingtonit.
Në të njëjtën kohë, ai shprehu gatishmërinë për të mbrojtur qëndrimin e tij. “Ky nuk është dialogu apo lufta ime e parë, e marr me qetësi”, tha ai.
Duke iu përgjigjur deklaratave të Trumpit për mungesën e transparencës në mënyrën se si shpenzohet ndihma financiare e SHBA-së për Ukrainën, Zelenskyy pranoi nevojën për qartësi për këtë çështje.
Sipas llogaritjeve të tij, lufta i ka kushtuar Ukrainës 320 miliardë dollarë, me 120 miliardë dollarë që kanë ardhur nga burimet e veta të Ukrainës dhe 200 miliardë dollarë të siguruara nga BE-ja dhe SHBA-ja.
Ai tha se Washingtoni i ka dhënë Ukrainës rreth 67 miliardë dollarë, së bashku me 31,5 miliardë dollarë shtesë në ndihmë të drejtpërdrejtë financiare për buxhetin e saj.
Zelenskyy tha se vendet evropiane mbeten ushtarakisht të dobëta, pavarësisht disa përmirësimeve. “Për sa i përket numrit të trupave, njësive luftarake, flotës, forcave ajrore dhe dronëve, Evropa është e dobët sot”, tha ai.
Ai pohoi gjithashtu se “Ukraina nuk do të arrijë fitoren pa mbështetjen e SHBA-së”, por Kievi nuk do të pranojë asnjë marrëveshje pa përfshirjen e tij, duke iu referuar bisedimeve fillestare në Riad midis SHBA-së dhe Rusisë për t’i dhënë fund luftës trevjeçare pa evropianët në tryezë.
I pyetur për projekt-marrëveshjen për metalet e rralla me SHBA-në, Zelenskyy kritikoi dokumentin, duke thënë se pika e vetme e qartë ishte se Ukrainës do t’i kërkohet të heqë dorë nga 50 për qind e gjithçkaje të listuar.
“Ky dokument nuk është gati. Ai shkon përtej autoritetit tim, përtej kompetencave të mia, përtej Kushtetutës së Ukrainës dhe ligjeve të saj. Cili është juridiksioni në New York? Nuk përmendet garancitë e sigurisë”, tha presidenti ukrainas.
