Netflix në vitin 2021 do të hapë zyrën në Stamboll

Platforma online e transmetimit Netflix ka bërë të ditur se do të hapë një zyrë në Stamboll deri në gjysmën e dytë të vitit 2021, raporton Anadolu Agency (AA).

Ministri i Kulturës dhe Turizmit i Turqisë, Mehmet Nuri Ersoy, ka mirëpritur këtë lëvizje, pasi industria e filmit dhe televizionit është bërë një mjet kryesor në promovimin dhe diplomacinë kulturore, si dhe kontributet ekonomike në vend.

"Fakti që serialet dhe filmat turq mund të shikohen në 190 vende do të ndihmojnë zhvillimin e turizmit të filmit të vendit", tha Ersoy.

Bashkë-themelues dhe shef ekzekutiv i Netflix-it, Reed Hastings, tha se vendimi tregon qartë angazhimin e kompanisë ndaj Turqisë.

Hastings tha se kjo lëvizje do të kontribuojë në prodhimin e Netflix-it të më shumë punimeve turke, që do të shijohet në të gjithë botën.

"Turqia është shumë e vlefshme për ne me kulturën e saj të pasur dhe një traditë të rrënjosur thellë të tregimit të historive. Prandaj, ne jemi krenarë që hapim një zyrë në Stamboll, një qytet madhështor", tha Hastings.

Drejtoreshë e përmbajtjes origjinale për Turqinë, Pelin Distas, tha se "eksitimi ynë për të treguar histori interesante të Turqisë na jep forcë për investimet tona në të ardhmen".

Vendet që shikojnë më shumë prodhimet origjinale dhe të licencuara turke të Netflix-it përfshijnë SHBA-të, Argjentinën, Australinë, Britaninë, Brazilin, Francën, Indinë, Spanjën, Italinë, Kanadanë, Kolumbinë, Meksikën, Poloninë, Arabinë Saudite dhe Kilin.

Në vitet e fundit, serialet televizive turke janë parë si pjesë e diplomacisë së "fuqisë së butë" të Turqisë, me seri që gëzojnë popullaritetin masiv në të gjithë botën, nga Pakistani deri në Amerikën e Jugut.

Serialet e njohura turke në Netflix përfshijnë "The Gift", "Bezhat C." dhe "Bir Başkadir" (Ethos).