Turqi, arrestohen 9 pjesëtarë të dyshuar të DEASH-it

Policia turke ka arrestuar nëntë të dyshuar të organizatës terroriste DEASH në një operacion në qytetin jugor Adana, raporton Anadolu Agency (AA).

Në kuadër të një operacioni kundër DEASH-it të nisur me urdhër të Prokurorisë Republikane të Adanasë, ekipet e antiterrorit fillimisht kanë identifikuar adresat e nëntë personave të dyshuar se kanë marrë pjesë në aktivitetet e organizatës, kanë bërë rekrutime dhe kërkime në emër të saj dhe kanë qenë në kontakt me pjesëtarët e këtij grupi terrorist.

Ekipet zhvilluan operacionin nëpër shtëpitë e pjesëtarëve të dyshuar të DEASH-it në kohën e agimit me mbështetje edhe të forcave speciale.

Policia konfiskoi disa materiale digjitale gjatë kërkimeve gjatë aksionit, ndërkohë që nëntë të arrestuarit, njëri prej të cilëve shtetas i Sirisë, janë dërguar në polici pas kontrollit shëndetësor në Repartin e Mjekësisë Ligjore të Adanasë.