ئایدن مه‌عروف: ''30ی ئه‌یلوول هه‌ڵبژاردن به‌ته‌نها بۆ په‌رله‌مانی كوردستان ده‌كرێت''

هه‌ولێر - AA

ئایدن مه‌عروف ده‌ڵێت له‌ 30ی ئه‌یلوول ته‌نها هه‌ڵبژاردن بۆ په‌رله‌مانی كوردستان ده‌كرێت و سه‌رۆكی هه‌رێم هه‌ڵنابژێردرێت.

سه‌رۆكی فراكسیۆنی به‌ره‌ی توركمانی له‌ په‌رله‌مانی كوردستان ئایدن مه‌عروف له‌ لێدوانێكدا بۆ ئاژانسی ئانادۆڵو باس له‌ په‌سه‌ندكردنی پڕۆژه‌ یاسای "هه‌ڵپه‌ساردنی دامه‌زراوه‌ی سه‌رۆكایه‌تی هه‌رێمی كوردستان" كرد كه‌ ئه‌مڕۆ په‌رله‌مانی كوردستان په‌سه‌ندی كرد و رایگه‌یاند "به‌گوێره‌ی ئه‌و پڕۆژه‌یه‌ هه‌ڵبژاردنی سه‌رۆكایه‌تی هه‌رێم له‌گه‌ڵ په‌رله‌مانی كوردستان ناكرێت كه‌ بڕیاره‌ له‌ 30ی ئه‌یلوول به‌ڕێوه‌بچێت، ئێستا سه‌رۆكایه‌تی هه‌رێم هه‌ڵپه‌سێردراوه‌ و چاره‌نووسی ده‌خرێته‌ ئه‌ستۆی خولی پێنجی په‌رله‌مانی كوردستان به‌شێوه‌یه‌ك له‌گه‌ڵ بنه‌ماكانی ده‌ستووری هه‌رێمی كوردستان بگونجێت ئه‌مه‌ش واته‌ ده‌بێت هه‌رێمی كوردستان ده‌ستووری هه‌بێت".

سه‌رۆكی فراكسیۆنی به‌ره‌ی توركمانی له‌ درێژه‌ی قسه‌كانیدا بۆ ئاژانسی ئانادۆڵو رایگه‌یاند "له‌ ئێستادا 30ی ئه‌یلوول ته‌نها هه‌ڵبژاردن بۆ په‌رله‌مانی كوردستان ده‌كرێت، سه‌رۆكایه‌تی هه‌رێم هه‌ڵنه‌وه‌شانه‌وه‌ته‌وه‌، به‌ڵكو هه‌ڵپه‌سێردراوه‌، له‌دوای یاسای دابه‌شكردنی ده‌سه‌ڵاته‌كانی سه‌رۆكایه‌تی هه‌رێم ئه‌و ده‌سه‌ڵاتانه‌ی به‌سه‌ر دامه‌زراوه‌كانی هه‌رێم دابه‌ش كرا، بۆیه‌ هه‌ر كاتێك ده‌ستووری هه‌رێمی هه‌بوو ئه‌و دامه‌زراوه‌یه‌ یان ئه‌كتیڤ ئه‌كرێته‌وه‌ یان هه‌ڵده‌وه‌شێته‌وه‌ كه‌ ئه‌مه‌یان دیار نییه‌ هێشتا و له‌ خولی پێنجه‌م ئه‌وه‌ یه‌كلایی ده‌كرێته‌وه‌".

جێی ئاماژه‌یه‌ له‌دانیشتنی ژماره‌ شه‌شی ئاسایی خۆیدا ئه‌مڕۆ چوارشه‌ممه‌ په‌رله‌مانی كوردستان پڕۆژه‌ یاسای "هه‌ڵپه‌ساردنی دامه‌زراوه‌ی سه‌رۆكایه‌تی هه‌رێمی كوردستان"ی په‌سه‌ندكرد كه‌ به‌پێی یاساكه‌ كاركردن به‌ یاسای دابه‌شكردنی ده‌سه‌ڵاته‌كانی سه‌رۆكی هه‌رێم ژماره‌ 2ی ساڵی 2017 به‌رده‌وام ده‌بێت و خوولی پێنجه‌می په‌رله‌مانیش پابه‌ندكراوه‌ كه‌ له‌ یه‌كه‌مین وه‌رزی گرێدانیدا و له‌ژێر رۆشنایی بنه‌ما گشتییه‌كانی ده‌ستوور بڕیار له‌سه‌ر چاره‌نووسی دامه‌زراوه‌ی سه‌رۆكایه‌تی هه‌رێم بدات، هه‌روه‌ها هه‌ر له‌و یاسایه‌دا دیوانی سه‌رۆكایه‌تی هه‌رێم به‌ستراوه‌ به‌ ئه‌نجوومه‌نی وه‌زیرانی هه‌رێم.