توركیا: "نموونه‌یه‌كی شه‌رمه‌زاریی به‌ سیاسیكردنی مێژووییه‌"

ئه‌نقه‌ره‌ - AA

وه‌زاره‌تی ده‌ره‌وه‌ی توركیا په‌سه‌ندكردنی پڕۆژه‌یاسای په‌یوه‌ندیدار به‌ رووداوه‌كانی ئه‌رمنی ١٩١٥ له‌لایه‌ن ئه‌نجوومه‌نی پیرانی ئه‌مریكاوه‌ وه‌ك 'كۆمه‌ڵكوژی' به 'نموونه‌یه‌كی شه‌رمه‌زاریی به‌ سیاسیكردنی مێژوو' ناوبرد و رایگه‌یاند: "ئه‌مه‌ هه‌وڵێكی تێكده‌رانه‌یه‌ بۆ زیانگه‌یاندن بۆ هه‌وڵه‌كانی پێشخستنی په‌یوه‌ندییه‌كانی نێوان توركیا و ئه‌مریكا".
‌
وه‌زاره‌تی ده‌ره‌وه‌ی له‌ راگه‌یه‌ندراوه‌كه‌یدا جه‌ختی له‌وه‌ كردووه‌ته‌وه‌ كه‌ بڕیاره‌كه‌ی ئه‌نجوومه‌نی پیرانی ئه‌مریكا له‌ رێكه‌وتی ١٢ی كانوونی یه‌كه‌می ٢٠١٩ سه‌باره‌ت به‌ رووداوه‌كانی ١٩١٥ به‌ ده‌ره‌ له‌ هه‌ر جۆره‌ زانیارییه‌كی مێژوویی و بنه‌مایه‌كی یاسایی، تیشكی خستۆته‌ سه‌ر ئه‌وه‌ی كه‌ ئه‌م بڕیاره‌ كارپێكراو نییه‌، پابه‌ند نابن پێوه‌ی و نووسیوویه‌تی: "ئه‌م بڕیاره‌ی ئه‌نجوومه‌نی پیران نموونه‌یه‌كی شه‌رمه‌زاریی به‌ سیاسیكردنی مێژوویه‌. به‌ڵام ئه‌وانه‌ی مێژوو بۆ مه‌رامی سیاسی به‌كارده‌هێنن، هه‌رگیز ناتوانن به‌ نادیده‌گرتنی راستییه‌كان به‌ ئامانجه‌كانیان بگه‌ن. ئه‌م بڕیاره‌ هاوكات‌ هه‌وڵێكی تێكده‌رانه‌یه‌ بۆ زیانگه‌یاندن بۆ هه‌وڵه‌كانی پێشخستنی په‌یوه‌ندییه‌كانی نێوان توركیا و ئه‌مریكا".

وه‌زاره‌تی ده‌ره‌وه‌ جه‌ختی له‌وه‌ش كرده‌وه‌ ئه‌م جۆره‌ بڕیاره‌ ناڕه‌وا و بێبیركردنه‌وانه‌ به‌ هیچ جۆرێك توركیا ساردناكه‌نه‌وه‌ بۆ پاراستنی به‌رژه‌وه‌ندییه‌كانی له‌ ناوچه‌كه‌.